Կարեն Կարապետյանը ստիպված կլինի հայտարարել, որ ինքն այլևս ակտուալ չէ

Jul 17, 2017 Comments Off on Կարեն Կարապետյանը ստիպված կլինի հայտարարել, որ ինքն այլևս ակտուալ չէ

 

Վարչապետ Կարեն Կարապետյանն այսօր ներկա է գտնվել «Հայաստանի 2017 թ. ազգային մրցունակության զեկույցի» շնորհանդեսին:
Զեկույցը համակողմանի վերլուծում է Հայաստանի տնտեսական կատարողականը, բեկումնային տեխնոլոգիաների տարածման ազդեցությունը և Հայաստանի համար ստեղծվող հնարավորությունները:
Համաժողովում վարչապետ Կարեն Կարապետյանը նորարարական ելույթ է ունեցել 4-րդ արդյունաբերական հեղափոխության, ռոբոտների դերակատարման մեծացման ու դրանով պայմանավորված՝ աշխատաշուկայում գործազրկության մեծացման մասին.
«Մենք բաց ենք աշխարհում տեղի ունեցող զարգացումներին, և մեզ համար շատ ակտուալ է հասկանալ և ձևակերպել՝ ինչպիսին է մեր մասնակցությունն այս գործընթացներին, ինչպիսի ազդեցություն կունենա 4-րդ արդյունաբերական հեղափոխությունը մեր կյանքի վրա, և մենք այսօր ինչ պետք է անենք՝ նշված մարտահրավերներին վաղը դիմակայելու և առավել ևս դրա դրական արդյունքներից և հնարավորություններից առավելագույնս օգտվելու համար։ Ակնհայտ է, որ զարգացման հետևանքով ավտոմատացումն էապես ազդելու է գործող աշխատաշուկայի վրա, և տեխնոլոգիան փոխարինելու է շատերին իրենց աշխատատեղերում։ Ընդ որում, դա անդրադառնալու է ոչ միայն դասական ոլորտների, ինչպիսին է, օրինակ, արտադրությունը, որտեղ ռոբոտաշինությունը կբերի ավելի օպտիմալ լուծումների, այլ նաև այլ ոլորտների վրա, ինչպիսիք են, օրինակ, խորհրդատվական ոլորտը, որտեղ արհեստական ինտելեկտը մեր փոխարեն կատարելու է բազմաթիվ գործառույթներ կամ նույնիսկ ֆինանսների կառավարման ոլորտը, որտեղ տեխնոլոգիան կփոխարինի մարդուն։
Մենք ունենալու ենք նոր հմտություններ և գիտելիքներ ձեռք բերելու կարիք։ Այդ իսկ պատճառով շատ կարևոր է ճիշտ կանխատեսել ապագայի մասնագիտությունների այն ամբողջությունը, որին մենք, արդեն այսօրվանից սկսած, պետք է պատրաստենք մեր քաղաքացիներին՝ տեխնոլոգիաների ներմուծումից առաջացած գործազրկության ֆենոմենից խուսափելու համար: Սա մեզանից պահանջում է համակարգային մոտեցում, և կրթական համակարգն այստեղ առաջնագծում է: Վերջապես, 4-րդ արդյունաբերական հեղափոխությունն իր հետ բերում է նաև ռազմավարության մշակման ոչ դասական մեխանիզմների կիրառման անհրաժեշտություն՝ ավելի շատ հիմնվելով զեկույցում առաջարկվող լուծումների վրա. ստեղծի՛ր բազմազանություն, ընտրի՛ր և բազմացրո՛ւ,- հայտարարել է Կարեն Կարապետյանը:
Նա ներկայացրել է 9 կետանոց տեսլական՝ տեխնոլոգիական հեղափոխությանը դիմագրավելու համատեքստում և եզրափակել իր խոսքը՝ «Կյանքը փոխվում է. որքան արագ փոխվենք, այնքան ավելի ակտուալ կլինենք»,- հորդորով:
Երբ Կարեն Կարապետյանը նոր էր դարձել վարչապետ, այսօրիանկ մոդեռն ոճի ելույթները հաճելի էր լսել, թվում էր մենք տեխնոլոգիական թռիչքի ենք պատրաստվում, մի տեսակ վերելքի սպասում կար: Բայց հեիմա, երբ երկրում ոչ մարդ է մնում, ոչ էլ անգամ ռոբոտ, երբ արտագաղթի ավելացող տեմպերին զուգահեռ ավելանում է նաև գործազրկությունը /պաշտոնական տվյալներով նախորդ տարվա նույն ժամանակահատվածի համեմատ գործազրկության աճ է արձանագրվել/ այս կարգի ելույթները հետաքրքիր չեն անգամ լսելու համար:
Ի՞նչ 4-րդ արդյունաբերական հեղափոխություն, ի՞նչ տեխնոլոգիաների մուտք. որտե՞ղ են դրանք, որտե՞ղ են խոստացված մի 3-4 մլրդ դոլարի ներդրումները, որոնցից 850 մլն-ը պետք է արվեր այս տարի, որտե՞ղ են այդ ներդրումների արդյունքում ստեղծված աշխատատեղերը: Այս ամենի մասին մենք ընդամենը լսել ենք, բայց չենք տեսել:
Պետական ապարատի կրճատումներն այս պահի միակ տեսանելի քայլերն են,որ կատարել է Կարեն Կարապետյանը, դրա հետևանքով ավելացել է գործազուրկների թիվը, այլ տեսանելի փոփոխություն աշխատաշուկայում առայժմ չկա:
Մի՞թե Կարեն Կարապետյանը չի հասկանում,իր սուպերմոդեռն ելույթներն արդեն ակտուալ չեն և վաղուց այլևս որևէ մեկին հետաքրքիր էլ չեն: Մարդկանց հետաքրքիր են կոնկրետ գործեր, կոնկրետ աշխատատեղեր. եթե դրաքն չեղան, շատ մոտ ապագայում Կարեն Կարապետյանը ստիպված կլինի հայտարարել, որ ինքն այլևս ակտուալ չէ:

Հայկ Դավթյան

Գլխավոր Թողարկում, Լուրեր, Վերլուծություն
Մեկնաբանությունները փակ են: