Բագրատ Սրբազանի հեղինակության շնորհիվ բերետավորները նահանջել են, բայց բիրտ ուժ կիրառելու մտավախությունը պահպանվում է

Լուսաձայնային նռնակ կիրառելուց հետո սև բերետավորների հեռանալու պատճառը, կարծում եմ, Բագրատ Սրբազանի ծանրակշիռ խոսքը, հորդորն էր։ Այս մասին «Փաստինֆո»-ի հետ զրույցում ասաց Բաղանիսի նախկին գյուղապետ Նարեկ Սահակյանը։

«Բագրատ Սրբազանի հեղինակությունը բավական բարձր է՝ ճշմարտությունը դավանող, քրիստոնեություն դավանող մարդկանց մեջ, նրա ազդեցությունն ու դերակատարությունը բավական մեծ է։ Կարծում եմ, հենց նրա հորդորի ու խնդրանքի հետևանք է այն, որ սև բերետավորները հետ քաշվեցին։

Չնայած դրան՝ մարդկանց շրջանում մտավախություն կա, որ կարող են նման ու էլ ավելի ծանր միջոցներ կիրառել խաղաղ բնակչության դեմ՝ չնայած, որ ցուցարարների շրջանում կանայք ու երեխաներ կան։ Ամեն ինչ էլ սպասելի է, դրա համար էլ բնակչությունը զգոնությունը չի կորցնում, ի վերջո, այս ընթացքում բոլորս էլ համոզվել ենք, որ մի բան ասում են, մեկ այլ բան անում», - ասաց նախկին գյուղապետը։

Նա ընդգծեց, որ Կիրանցի ճանապարհն այս պահին էլ փակ է։ «Անհնազանդության ակցիան շարունակվում է,առաջին օրվանից էլ մարդիկ իրենց անհամաձայնությունն ու անհանգստությունն են հայտնում։ Մենք սահմանազատմանը դեմ չենք, սահմանազատում թող լինի, բայց ոչ միակողմանի զիջում։ Մենք էլ հողեր ունենք, որ իրենց վերահսկողության տակ է, դրանց ճակատագրի մասին մենք տեղյակ չենք, չգիտենք, դրանք փոխանցվելու են մեզ, թե ոչ։ Չգիտենք, թե ինչ է մեզ սպասցում։

Հայաստանի դարպասներից մեկն էլ Բաղանիսն է, այս տարբերակով սահմանազատում անելուց հետո Հայաստանի դարպասները բացվում են ու տարիներով ամրապնդված բնագծերը ճեղքվում են թուլանում են, մեր անհանգստությունը սա է»։

Նրա փոխանցմամբ՝ Բաղանիսի հատվածում որոշակի աշխատանքներ կատարվել են։ «Չնայած դրան, հույս ունենք, որ այս գործընթացը ժողովրդի ճնշման տակ հնարավոր կլինի կանգնեցնել»,-ասաց Սահակյանը։