Կրակել են հենց եկեղեցու բակում՝ հոգեհանգստի արարողության ժամանակ․ մանրամասներ Հրազդանի «վենդետայից»
ՀՀ քննչական կոմիտեի Կոտայքի մարզային քննչական վարչությունում «սպանություն», «սպանության փորձ» հատկանիշներով նախաձեռնվել է քրեական վարույթ մայիսի 18-ին Հրազդան քաղաքի Վանատուր թաղամասի եկեղեցու դիմաց հնչած կրակոցների, սպանության փաստով։
Shamshyan.com-ի հաղորդմամբ՝ նախաձեռնված քրեական վարույթի շրջանակում քննիչի որոշմամբ երկու անձ՝ որպես կասկածյալ, ձերբակալվել է։
Պարզվել է, որ եկեղեցու բակում հոգեհանգստի արարողության ժամանակ Արսեն Հունանյանի ուղղությամբ կրակոցներ է արձակվել 3 հատ։ Հենց եկեղեցու բակում էլ ոստիկաններն ու քննիչները հայտնաբերել են կրակված 3 պարկուճ և արնանման հետքեր, իսկ արդեն եկեղեցուց մոտ 1 կմ հեռավորության վրա՝ հարակից փողոցներից մեկում, հետևի հատվածում վնավասծ «Օպել» մակնիշի ավտոմեքենա, «Օպել»-ից մի քանի մետր հեռավորության վրա՝ Կոտայքի մարզի բնակիչ 50-ամյա Արծրուն Ավետյանի դին։
Դիակի մոտ հայտնաբերվել է «Մակարով» տեսակի ատրճանակ, իսկ փողոցի սկզբնամասում՝ ատրճանակից կրակված 6 պարկուճ։
Մինչ դեպքի վայրում աշխատել են քննիչներն ու փորձաքրեագետները, պարեկները Երևան-Սևան ավտոճանապարհի Չարենցավանի վարչական տարածքում դեպի Երևան ընթացող հատվածում հայտնաբերել են «Toyota Land Cruiser» մակնիշի ավտոմեքենա՝ առջևի հատվածը ամբողջովին վնասված։
Իրավապահներն ունեն հավաստի տեղեկություններ և վստահ են, որ հենց նշված ավտոմեքենայով են եկեղեցու բակից հետապնդել սպանություն կատարողին, որը եղել է նշված «Օեպել» մակնիշի ավտոմեքենայով։
«Օպել»-ը քննիչի որոշմամբ տեղափոխվել է ոստիկանության Հրազդանի բաժնի պահպանվող հատուկ տարածք։
Նախաքննության շահերից ելնելով՝ որոշ հանգամանքներ այս պահին չեն հրապարակվում։ Նշվում է, որ միջադեպի հիմնական վարկածներից մեկը վրեժխնդրությունն է՝ «վենդետան»։