Շատ մեծ հանրահավաք կլինի՝ ձեր ուզած ու պատկերացրած քայլերը հասցնելու իրենց հանգրվանին․ Բագրատ Սրբազան

Սուրբ Աննա եկեղեցու բակում Բագրատ Սրբազանը պայքարին միացած քաղաքացիներին հայտնեց՝ Գառնիկ Դանիելյանը Շարժման պատվիրակության հետ կմեկնի Կիրանց։ Իսկ Շարժումը հանուն հայրենիքի է՝ հանուն Տավուշի, հանուն Սյունիքի, հանուն Ջերմուկի, հանուն Վարդենիսի, հանուն Արցախի։

Այսօր, ինչպես տեղեկացրեց Սրբազանը, հանդիպումներ են տեղի ունեցել մի շարք կուսակցությունների ու գործիչների հետ՝ «Հայրենիք» կուսակցության, ԱԻՄ նախագահ Պարույր Հայրիկյանի, Շանթ Հարությունյանի, տարբեր անհատների, տարբեր ոլորտների ներկայացուցիչների հետ։

Վաղը հանդիպումներ են նախատեսված երիտասարդության հետ՝ ԵՊՀ-ի մոտ բաց դասախոսություն է, բժշկական համայնքի ներկայացուցիչների հետ են նաև հանդիպելու, ավելի ուշ՝ 100-ից ավելի դասախոսների հետ, որոնք նույնպես Նիկոլ Փաշինյանի հրաժարականի պահանջին են միացել։ Առաջիկայում հանդիպում կլինի մշակութային գործիչների հետ, ապա՝ պահեստազորի սպաների հետ։

«Շաբաթ օրը առավոտյան ժամը 11։00-ին բոլոր քաղաքական կուսակցություններին՝ անխտիր, հրավիրում ենք հանդիպման։ Այս հանդիպումները շատ կարևոր են»,- ասաց Սրբազանը։

Նա տեղեկացրեց նաև՝ շուտով կկայանա կարևոր, առանցքային հանրահավաքը։

«Շատ մեծ հանրահավաք՝ ձեր ուզած ու պատկերացրած քայլերը հասցնելու այն հանգրվանին, որտեղ պետք է հասնեն»,- ասաց Բագրատ Սրբազանը։