Երբ «Արևմտյան Ադրբեջան» հասկացությունը մեջտեղից հանեն՝ կմտածենք, որ իրոք խաղաղություն հաստատելու նպատակով են սա անում. Ոսկեպարցի
Աշխարհում կա՞ մի երկիր, որտեղ շահեկան դիրքերը հանձնում են թշնամուն, թե գուցե խաղաղություն լինի, գուցե ոչ, բա որ չեղա՞վ,- «Փաստինֆո»-ին ասել է Ոսկեպարի բնակչուհին՝ նշելով, որ իրենց համար իրավիճակը շատ չի տարբերվում՝ Կիրանցից, Բաղենիսից։
Երեկ Հայաստանի ու Ադրբեջանի փոխվարչապետերի միջեւ ստորագրված արձանագրության մեջ, ըստ մեր զրուցակցի, անսպասելի ոչինչ չկար իրենց համար, քանի որ նախապես ասվել է, որ մայիսի 15-ին ստորագրվելու է այն։ Ավելին՝ Ոսկեպարում ականազերծումն արագ էլ արվեց։
«Որպես դրական փաստ նշում են, որ եկեղեցին մեզ է մնում, դե այնպես են ներկայացնում, կարծես նախօրոք այլ բան էին ասել»,- նշեց բնակչուհին՝ ավելացնելով, որ եկեղեցու խնդրի մասին նախկինում շատ են բարձրաձայնել, որովհետեւ այն շատ է մոտենում Ադրբեջանի հետ սահմանին եւ ոչ թե, որ 7-րդ դարի եկեղեցին մտադիր էին հանձնել Ադրբեջանին։
«Ասում ենք ու վստահ ենք, որ իրենց սահմանապահները մինչև ատամները զինված են ժամանակակից զենքով ու դա բանակ է։
«Ախր ո՞նց բացատրենք, որ ողջ ազգը հասկանա։Մեր եղբայրները, տղաները, հայրերը ամուսինները ծառայում են, հիմնական մասը կամ զինվորական է եղել ու պատերազմել, կամ հենց մեր տունը պաշտպանելու համար են պայմանագրային դարձել։ Դիրքերը, որ հանձնեն, դրանից հետո ի՞նչ սահման,ի՞նչ սահմանապահ, որ պահին Ադրբեջանն ուզի, նորից իր անհագ ախորժակի մասին կհիշեցնի։ Դե եթե այդպես չէ, եթե խաղաղություն է ուզում, ապա թո՛ղ իր երկրում հակահայ քարոզչական քայլերը դադարեցնի» , - ասաց ոսկեպարցին՝ նշելով, որ երբ «Արևմտյան Ադրբեջան» հասկացությունը շրջանառությունից կհանեն, իրենք էլ կմտածեն, որ Ադրբեջանում, իրոք, խաղաղություն հաստատելու նպատակով են սա անում։
Ոսկեպարի բնակչուհին մասնակցել է «Տավուշը հանուն հայրենիքի շարժման» ակցիաներին, որոնք տեղի են ունեցել Տավուշում, սակայն նշեց, որ Երեւան չեն տեղափոխվել՝ գյուղն անտեր չթողնելու համար։ «Ե՞րբ եք հասկանալու, որ Ադրբեջանը կանգ չի առնելու։ Լավ, աշխարհում կա՞ մի երկիր, որտեղ շահեկան դիրքերը հանձնում են թշնամուն՝ գուցե խաղաղություն լինի, գուցե ոչ, բա որ չեղա՞վ», - ասաց ոսկեպարցին։