Երևանը պետք է ոտքի կանգնի, որ Կիրանցը կարողանա իր նպատակին հասնել. Աշոտյան
Հակակոռուպցիոն դատարանում՝ դատավոր Վահե Դոլմազյանի նախագահությամբ, հետաձգվեցին ՀՀԿ փոխնախագահ Արմեն Աշոտյանի և մյուսների գործով դատալսումները։
Դատական նիստի մեկնարկին նախագահողը հայտնեց, որ մեղադրյալ Մարթա Սիմոնյանի պաշտպանի կողմից միջնորդություն է ներկայացվել, համաձայն որի՝ Սիմոնյանը չի կարող ներկայանալ նիստին, ըստ այդմ, նիստը հետաձգվեց։ Մինչ Արմեն Աշոտյանին ոստիկանության ծառայողները կուղեկցեին նիստերի դահլիճից դուրս՝ լրագրողները մի քանի հարց ուղղեցին՝ Կիրանցում տիրող իրավիճակի վերաբերյալ։
«Երևանը պետք է ոտքի կանգնի, որ Կիրանցն իր նպատակին հասնի։ եթե Երևանում փոփոխություններ չլինեն, մնացած բոլոր պայքարները շատ գովելի են, բայց վերջնական արդյունքի բերող չեն»,- նշեց Աշոտյանը՝ հավելելով, որ ինքն ազատության մեջ լինելու դեպքում կգտնվեր Տավուշում, բայց խնդիրը Երևանում է լուծվում։
Ինչ վերաբերում է գլխավոր դատախազի տարեկան հաղորդմանը, ապա Աշոտյանը հայտնեց, որ իր վերաբերյալ զրպարտություն և կեղծիք է տեղ գտել, իր փաստաբանները պահանջել են հերքում՝ զրպարտության համար։
«Հուսով եմ՝ տիկին դատախազը սեփական օրինակով ցույց կտա, որ օրենքը գոնե ձևական առումով հարգում է»,- ասաց նա։
Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։
Հեղինակ՝ Իզաբել Սահակյան
Աղբյուր` Փաստինֆո
Հետևեք մեզ Viber-ում
