Բերքաբերի համայնքապետը՝ Ալիեւի հայտարարության մասին

Ամեն ինչ պետք է անենք, որ Բերքաբերի հողատարածքները վերադարձնենք Բերքաբերի ժողովրդին,- «Փաստինֆո»-ի հետ զրույցում ասել է Բերքաբեր համայնքի համայնքապետ Տիգրան Հարությունյանը՝ խոսելով իրականացվող սահմանազատման ու սահմանագծման աշխատանքների մասին։

Տավուշի մարզի սահմանամերձ Բերքաբերը անհաղորդ է իրականացվող ապօրինի սահմանազատման հետեւանքով առաջացող անվտանգային խնդիրներին ու, ըստ էության, պաշտոնապես չի միացել տավուշյան շարժմանը. այստեղ մտածում են միայն գյուղի նեղ շահերից ելնելով՝ հույս ունենալով, որ Ադրբեջանը կվերադարձնի դեռեւս 1990-ականներին օկուպացված տարածքները։

Ապրիլի 19-ին ՀՀ կառավարության ու ԱԳՆ-ի հրապարակած տեղեկատվության ու քարտեզների համաձայն՝ Հայաստանը միայն զիջողի դերում է եւ Ադրբեջանը ոչինչ չի վերադարձնելու, իսկ ապրիլի 28-ին արհեստածին Ադրբեջանի նախագահ Իլհամ Ալիեւը հայտարարել է, որ ներկայումս ոչ միայն սահմանազատում է արվում, այլ նաեւ՝ սահմանագծում։ Այսինքն՝ Տավուշի այդ հատվածը համարելու են սահմանագծված՝ առանց Բերքաբերի հողերը վերադարձնելու։

«Փաստինֆո»-ն մեկնաբանության համար դիմել էր Բերքաբերի համայնքապետին՝ ակնկալելով ստանալ նրա մեկնաբանությունը՝ Բերքաբերի օկուպացված տարածքները Ադրբեջանի կազմում թողնելով պետական սահման գծելու փաստի վերաբերյալ։

Տիգրան Հարությունյանը մեկնաբանությունից խուսանավեց՝ ասելով. «Դուք լսե՞լ եք Ալիևին, ես չեմ լսել, ես Ալիևին չեմ ցանկանում մեկնաբանել, ես գիտեմ, որ ամեն ինչ պետք է անենք, որ Բերքաբերի հողատարածքները վերադարձնենք Բերքաբերի ժողովրդին»։